Alejandra Cijntje

Mi yu muhé

Dede krusá, man den man duru tené pa sigurá ku huntu nan lo yega na e mesun destinashon. Pero idealismo diktorial a sakudí i violá nan derechi sivil, rementá e diamante, kousa separashon. I asina riba awa salu tin memoria tierno ku su famia wardá den un kahita ku e no por a hiba.

Su rais ranká for di lodo, sin opshon e la entregá su resiliensia pa deskubrí e nifikashon di resilisia. Anhelo den ola di imágen kariñoso ta drif sin fin pa rekordé ku e ta geologia magnífiko. Bosnan na Merka, i nos na Kòrsou. Den dualismo e la guia tres niñas di friu pa yega na kalor.  “Nos ta ban ku fakansi na Kòrsou”  a resultá komo un estadia sin buèlta. Dia nan ta pasa i realidat ta un soño, “mama, ki dia nos lo por renkontrá atrobe?’ Un kontesta sin promesa nuansá ku e misterio ku den un será di wowo, nan ta den un otro ambiente. Ku su sonrisa mi yu muhe lo siña i navegá manera mi, i den e  proseso e lo kombertí den un flor de mayo ku fragansia di kibrahacha. 

Fòrsa, rementá, i riba pia di nobo, e ta yu muhé di un mago. Komo mi yu, mi a regalé tur mi bon karma pa suavisá su karga. Bista riba e vishon, un futuro próspero apesar tur sirkunstansia ku ta provoká su balentia pa traha duru p’é pan i kama di kada dia. Pa por kome i sosegá den kompania. Bida no ta tuma sin keda dun’é un chispa di alkemia komo regalo  p’e  rekonosé ku felisidat ta koló di su identidat. Petalo pa petalo e ta konsientemente keda serka di amor. Un bista pintóresko ku solamente un kurason ku sa e balor di gotas frias durante yobida por mira Dios su aparensia tur kaminda. Su yu nan ta atmir’é, i reflehá su balor.

Grandesa di Kòrsou pero e no ta ni di aki ni di aya i alabes semper na kas den su Onmipresensia. Di su bida e ta hasi un fiesta ku brisa di su Omnipotensia. Libèrtat ta un konsepto ku semper e lo konfrontá ku guia den melodia di su Omnisiensia. Den un será di wowo, e ta den un otro ambiente konmemorando e momentunan di e kahita kusu famia ku a sigui ekspandé, disfruntando di memorianan nobo ku e latido di su kurason ta warda esaki p’é. Semper huntu kun’é. Mi ta semper huntu kun’é.