Melitsa  Hayer

Ora bo mirami

Na promé bista mi no parsebo. Bo sa ku mi no ta djaki. Mi kaná. Mi kabei. Mi estatura. Mi koló.  “Unu mas” lo bo pensa. Anto ei bo a stòp di mirami.

Pero wak atrobe. Wak mi un minüt.

Den esun minüt ei lo bo mira ku ami ku bo, nos bida, esta mi bida promé ku mi a yega aki, ta mésun kos. Meskos ku bo, mi stima mi famia i amigunan ku fervor. Anto pa algun di nan sin pensa, nos lo duna nos bida pa nan. Tur dia bo ta atendé bo kas i sali bai traha. Ami tambe. Por ta bo tin un trabou òf bo tin un negoshi chikí, lora man manera boso ta bisa, ku ta generá sufisiente pa pone kuminda riba mesa i kubri gastunan. Ami tabata lora man ku un kiosko na skina.

Wak mi un minüt. Bo ta mira ku riba un dia ami ku bo, nos historia, a stòp di ta mésun kos. Mi mainta nan a bira momentunan di desesperashon. Kuminda tur dia tabata birando ménos. A yega e dia ku te asta hariña pa traha arepa a kaba. Anto manera di generá entrada tampoko no tabatin.

Pa ami e futuro a bira kostumbrá ku pasa hamber. Dios laga nunka bo komprondé kiko mi ta bisando. Unda ku mi a bira, e úniko opshon tabata sali for di Venezuela.

Mi a yena mi mes ku kurashi, hasi duru i pa promé biaha den mi bida m’a subi un avión pa bai buska trabou. Sin mi kasá, mama i yunan. Tabata manera bula for di un baranka sin garantía ku eibou lo mi topa awa.

Wak mi un minüt . Den e minüt ei lo bo mira un muhé ku su amor pa esnan ku e stima a dun’é kurashi pa krusa laman su so pa bin buska trabou. E mésun amor ei a dun’é e forsa nesesario pa para firme ora el a topa inhustisia, bira kreativo pa traha i yama danki ora e topa generosidat.

Lo bo mira un muhé ku ta yora so di impotensha di no por yuda su famia manera e ke, ku ta yora di dolor pa otronan ku méskos kun’é a bai buska un mihó bida pero nunka no a yega e destinashon, i yora di tristesa pasobra e tin falta di su famia.

Ora bo mirami, wak mi un minüt.

Basá riba eksperensianan di Rosa Sánchez